2017年4月6日 星期四

股票創52週新低,買定沽?

記得上年去匯豐銀行開港股及美股證券戶口,當然其中一個步驟是做一份投資風險評估,過程由銀行職員問我答,其中一條問題令我覺得奇怪。

職員:當你手持一隻股票跌破52週低位,你會再買入定沽出?
夢想爸爸:睇吓跌破的原因係咩…同埋基本面係咪良好。
職員:咁你會買定沽?
夢想爸爸:視乎情況la, 咁我答買定沽代表我可以接受高風險呀?
職員:(心諗)這個人真麻煩,明明問題只得兩個選擇,係都唔肯揀。

我反問後靜咗大概10秒,職員諗緊點答。

夢想爸爸:咁我揀買la,買應該代表可以承受高風險吧!

開戶順利完成,由2016年我開始可以買美股了!

近幾日腦海突然浮現這一幕,所以想在blog中分享一下。關於跌破52週低位買定沽,我經過思考後得到這些答案:

點解用52週做指標?可能是容易計算,可能是1年具代表性,可能是數字上運用的慣性。但應該對企業本身的價值沒有一個太大參考意義。

對於技術分析而言,跌破52週低位代表股票因一些風險因素增加(業績,管理,政策,匯率……)導致股價持續受沽壓,跌破後亦有可能引發更大的沽壓,所以屬利淡訊號,應該要沽貨。但股價下跌,不只受風險因素影響,還有市場的情緒因素影響。巴菲特提醒過,價值投資者可以利用市場的情緒來幫助自己投資。這批大特價股票,有沒有一些其實唔差但被市場的情緒所影響導致明明係寶都變咗係草?

這個訊號一定是屬負面訊號嗎?道理同買衫一樣,你以前$100買了一件衫,現在看見大特價$50,見到都心痛,相反你之前未買,現在可以用$50買之前$100的東西仲唔開心到彈起。另外,大特價那堆衫一般好少有靚嘢,靚嘢好少要大折扣兼且一早就比人買曬,但「偶然」都會拾到寶。

以上的思考令我在2016年下半年開始留意創52週新低的股票,另外就是那些從高位下跌超過15-20%的股票。當然,留意到這些股票就要認真看企業業績報告和了解下跌原因,再冷靜分析下跌的原因是否情緒因素比風險因素更多。

這是我其中一個新嘗試的選股方法,第一擊於今年2月於$27.85買入創科實業(股價於2017年1月中旬創52週新低),希望自己無執咗草當係寶。

9 則留言:

  1. 我懷疑那是職員好奇心發作多於監管要求...

    回覆刪除
    回覆
    1. 哈哈,可能係,因為佢問我時係望住部電腦,我根本睇唔到d問題。

      刪除
  2. 職員個問題好奇怪,可唔可以答:不變

    另外,有冇諗過一件衫如果特價,係因為過時唔興,換季之類原因,雖然係同一件衫,但係唔適當既時候著就會格格不入甚至凍親。

    回覆刪除
    回覆
    1. 「過時唔興」這4個字刺激了我思考,多謝你。另外,無論買衫定買股,都要買適合自己的,否則買了唔著就浪費了。

      刪除
  3. 跟本上無標準答案,答沽同買都唔一定做對,真係多餘

    回覆刪除
    回覆
    1. 其實銀行平時仲有好多奇趣嘢,有次我去建行(亞洲)問吓孖展戶口,佢強烈推介我......去別的銀行開。(可能睇我個樣覺得我好唔掂)

      刪除
    2. 似乎好多銀行都唔想做股票孖展生意

      刪除
    3. 我後來去中銀開,因為大部份資產,樓按,出糧都係中銀,終於開到。開果時個職員都好似好緊張咁,重點係佢好唔熟,填Form都填錯兩次,開咗個半鍾。其實係咪好少人會開孖展戶口?

      刪除
    4. 似乎多數股票孖展係證券公司開,銀行比較鍾意做外匯孖展,我諗係監管風險和利潤不成正比

      刪除