高息股通往財務自由？

 上一篇講到有位讀者，佢希望透過買高息股去達到財務自由，最後卻係唔成功。最主要原因佢誤會咗財務自由個概念，佢以為追求財務自由既過程，都係一定以收息股產生被動收入然後再投資，係唯一的辦法｡

相信大家都會明白，財務自由係講緊每月平均被動收入，等於或高過每月生活支出（記住仲要計埋通脹的因素）。但係，追求財務自由個過程，其實有好多途徑，最主要嘅大方向就係要去累積一些「好資產」和增加主動收入。大部份人都focus咗選好資產(主要買增長股和收息股)，然後等股價升或收股息再投資，但一般投資者會較忽視增加主動收入和增加儲蓄，但我想講︰增加主動收入和增加儲蓄係好重要！好重要！好重要！所以我三年前要創業就係咁解，公司第二年即係2019年，上半年盈利已經係以前一年的薪金，但係今年就... ... 不過我相信疫情過去公司就會上返軌道。另外，我仲有keep住投資自己，考了些國際認証，一方面係興趣，另一方面都可以提升主動收入。仲有，我經常會將一D新淨唔用的東西賣出去，一年都賺返幾千。

所以，增加主動收入，增加儲蓄，買入好資產，增加被動收入，財務自由就唔難達到la。

買股票，謹記買「好股票」
我強調「好股票」，就是想說明無論係唔係高息股都唔係最重要，最重要係「好」。每個人對「好股票」的定義都不同，所以投資股票前，不妨將自己「好股票」的標準列出來。如果覺得好股票係超穩定，盈利增長和股息增長跟到通脹就可以，咁中電都係好股票之一; 但要求高d，期望股息增長多過7%，可能香港電訊都係好股; 如果期望再最高d，希望盈利在未來三年平均有20%增長，可能騰訊可以，其實仲有好多。

高息股
買高息股收息，然後股息再投資得唔得呀? 得，當然得，但個考慮點千祈唔好只放係股息率，有D好息散戶係aastock見到6厘,7厘，然後就自我催眠，話自己係收息再投資，股價唔洗理。 對我黎講，股息率最有參考價值的時段係業績公布後至除淨前，除淨後焦點要放返去下次派息，即係你要估計佢下次派息仲keep唔keep到甚至可以增加派息。當然唔係齋估，而係最起碼從三方面去評估︰1. 公司過往派發的股息穩定度 2. 公司未來盈利的穩定度 3. 派息政策


公司過往派發的股息穩定度
如果你買股票係為咗收息再投資，應該係屬於中長線投資，所以你應讓會期望佢有穩定的盈利和穩定的派息，但係，我哋應該將個期望調高少少，隻股票應該係有穩定的盈利增長和穩定的派息增長。

例子︰有個中產人2012年睇中香港電訊，他在2012年首個交易日用100萬投資，在$4.822買咗207,000股，2012年期間，香港電訊派了0.2342股息，即是中產先生收到$48,479.4股息。

假設香港電訊由2012年至2019年期間股價不變和派息不變，2020年首個交易日$4.822沽出價值$998,154，另外8年間收到股息共$387,835.2，資產共增值1.38倍

假設香港電訊由2012年至2019年期間派息不變，2020年首個交易日$11.64沽出價值$2,409,480，另外8年間收到股息共$387,835.2，資產共增值2.79倍

假設香港電訊由2012年至2019年期間股價不變，但派息跟實際一樣有增長，2020年首個交易日$4.822沽出價值$998,154，另外8年間收到股息共$856,131.3，資產共增值1.85倍

真實情況，香港電訊由2012年至2019年期間，股價穩定增長，每股派息穩定增長，2020年首個交易日$11.64沽出價值$2,409,480，另外8年間收到股息共$856,131.3，資產共增值3.26倍

如果，每年股息下年首個交易日再投入呢???
股數由207,000股增加至306,000股，2020年首個交易日$11.64沽出價值$3,561,840，每年未能再投入之餘下現金$34,894.8，資產共增值3.59倍。
這位由一百萬開始的中產先生，在2019年收息$199,930.2，即是每月被動收入$16,660。

總結一下，我主要係想講，唔好只係睇股息率，股息增長率都好重要 (香港電訊2012-2019年度的股息複合增長率有7.8%)。另外，公司基本面和盈利增長是長遠推升股價和每股派息的重要原因，要非常非常重視呀！其實仲有好多因素影響，如平均買入價、資產配置等，有機會再分享la

下一篇，會試吓睇多幾隻收息股的過往表現。